RIBEIRA> Palmeira berrou unida por unha sanidade pública de calidade. Centos de persoas participaron na mobilización convocada este domingo para reclamar un médico a tempo completo na localidade.
‘Palmeira, en loita e Palmeira non se pecha’. Baixo estes lemas, centos de persoas partiron este domingo do lugar da Lagüiña para reclamar a cobertura a tempo completo da baixa do médico de Palmeira.
A manifestación discorreu ó longo da AC-305, a principal vía da localidade, polo que moitos condutores tiveron que ser desviados por estradas secundarias. A mobilización rematou ás portas do centro de saúde onde tivo lugar a lectura dun manifesto a cargo da plataforma veciñal convocante da mobilización.
Temen que esta situación derive finalmente no peche do centro de saúde de Palmeira, tal e como aconteceu en Taragoña e Cabo de Cruz. Así as cousas, dende a plataforma teñen previsto seguir adiante con novas protestas ata conseguir a cobertura estable e continuada da praza de médico na localidade.
