RIANXO> Iniciadas as obras da senda peonil que conectará os lugares da Casilla co Araño e Burés, en Rianxo. Os traballos, acometidos pola Consellería de Infraestruturas supoñen un investimento de máis de medio millón de euros.
As obras iniciadas esta semana na AC-305 ó seu paso por Rianxo mellorarán notablemente a seguridade nun treito da vía comarcal que non permitía o desprazamento de peóns. Executaranse unha senda peonil ó longo de máis dun quilómetro pola marxe dereita da estrada que conectará os lugares da Casilla, O Araño e Burés. Dáse así resposta a unha vella demanda veciñal dos residentes nestas zonas que contan con gran número de vivendas.
A senda desenvolverase en dous treitos: o primeiro dende Burés ata o lugar dos Xens onde conectará cunha senda xa existente. O segundo tramo discorrerá entre Contres e a Casilla. As obras contan cun investimento de medio millón de euros e un prazo de execución de seis meses polo que poderán estar rematadas de cara á próxima primavera. Xunto a elas, acométese unha actuación adicional na outra marxe da estrada coa execución dunha senda en Burés, adxudicada por un importe de 50 mil euros.