RIBEIRA> Ribeira acollerá este sábado a primeira feira do Vinilo ‘Xiradiscos’. Ademais dun mercado no que terán presenza diversos selos discográficos, haberá concertos e actividades para nenos.
Os amantes do vinilo teñen unha cita este sábado en Ribeira. Durante toda a xornada a praza de Vigo dará cabida á primeira edición de Xiradiscos, unha feira que pretende poñer en valor este formato aínda descoñecido pola xente máis nova .
Discográficas independentes de toda Galicia daranse cita no evento que inclúe tamén concertos e sesións DJ. Os organizadores buscan ademais converter esta feira nun punto de encontro familiar polo que se desenvolverá un obradoiro para nenos.
O concello de Ribeira colabora coa organización desta cita que corre a cargo de Smart Studio, Radix Records e Buena Pieza. O obxectivo é darlle continuidade en futuras edicións polo que agardan unha gran afluencia de público.
