RIBEIRA> A asociación AMICOS inaugurou a segunda edición do proxecto LabMar cunha xornada mediomabiental na lonxa de Ribeira. Na iniciativa participaron escolares do CEIP O Grupo de Ribeira que aprenderon dun xeito lúdico a previr a contaminación e reciclar o lixo mariño.
A lonxa de Ribeira foi escenario esta mañá da primeira xornada do Programa Labmar, unha iniciativa conxunta entre FUNDAMAR, AMICOS e a Federación Nacional de Confrarías de Pescadores. Trátase xa da segunda fase desta iniciativa enfocada na prevención da contaminación e a valorización dos residuos mariños.
Na xornada inaugural participaron uns 70 escolares de infantil e primaria do CEIP O Grupo que tiveron ocasión de achegarse, a través de distintos xogos de educación ambiental, a materias como a clasificación dos residuos, a circulación oceánica dos lixos mariños ou a arte con reciclaxe.
Esta segunda edición dá continuidade ó proxecto desenvolvido o pasado ano en Galicia e Andalucía incorporando este ano á Comunidade Valenciana e Asturias co obxectivo de ampliar o seu impacto territorial e reforzar o traballo colaborativo entre entidades sociais, comunidade escolar, sector pesqueiro e tecido socioeconómico local.
