PONTEVEDRA> Finalmente, a Deputación de Pontevedra manterá o servizo da imprenta provincial. Iso si, mudará de localización, dende a Xunqueira de Alba ás instalacións do Príncipe Felipe. De feito, o edificio actual será desmantelado, convertendo a parcela nunha zona verde.
A imprenta provincial despedirase da Xunqueira de Alba. A Deputación de Pontevedra decidiu trasladar o servizo ata as instalacións do Príncipe Felipe.
O que non se salva é o edificio que ata o de agora acolleu a imprenta. A Deputación continúa os trámites para derrubalo, deixando libre unha parcela de case 3.000 metros cadrados na Xunqueira de Alba que se converterá nunha zona verde.
Este é un paso máis na recuperación deste espazo. A Deputación avanza tamén na demolición do edificio do parque de maquinaria, que se trasladará ao polígono de Barro. Neste proceso, sacaranse a poxa pública algúns recursos do servizo.
Dende o goberno provincial estiman que a finalización das obras no polígono de Barro e a rexeneración da Xunqueira podería estar rematadas no primeiro trimestre do 2023.
O desmantelamento do parque de maquinaria conta cun orzamento de máis dun millón de euros. No caso da imprenta, os traballos están orzamentados en case 275.000.
