BOIRO> O alcalde, José Ramón Romero, e a edil de Educación, María Outeiral, aproveitaron a súa visita ó CEIP de Escarabote para anunciar a súa intención de repetir este curso escolar co proxecto En(clave), atendendo á propia solicitude dos centros educativos do municipio.
Trátase dun programa que ten coma finalidade traballar sobre accións relacionadas coa igualdade de xénero e a resolución de conflitos en diferentes áreas, como poden ser a educación e a prevención ou a saúde e o benestar.
Durante a visita tiveron tempo tamén de supervisar as obras de mantemento xeral levadas a cabo no colexio antes do inicio do curso, entre as que se atopaban o pintado das aulas, diversos arranxos no patio e na zona de xogos ou a mellora dos accesos ó centro, entre outras.
Dende a dirección agradeceron as obras realizadas e a boa disposición mostrada dende o Concello.
O Concello ten previsto acometer tamén proximamente a mellora dun camiño de acceso ó centro educativo que une o colexio co núcleo de Escarabote e polo que transitan numerosos alumnos que asisten ó centro.
A actuación conta cun investimento de algo máis de 13 mil euros, financiado con cargo ó remanente de tesourería de 2021.
