BOIRO> Unha chamada dun particular ó 112, ó observar que saía fume do establecemento, situado en Praia Xardín, fixo saltar tódalas alarmas. Eran preto das cinco da mañá.
Rapidamente se desprazaron ata o lugar os equipos de emerxencia de garda, primeiro do propio parque de bombeiros comarcal de Boiro, pero tamén do parque de Ribeira, Protección Civil e tamén Policía Local.
Por fortuna non houbo que lamentar danos persoais, xa que o restaurante estaba pechado á hora na que se orixinou o incendio, aínda que as instalacións, de madeira, quedaron totalmente calcinadas.
No lugar, o propietario do establecemento, mostrábase visiblemente afectado. Rexentaba o local dende o ano 2013
Esta mañá, os equipos de emerxencias seguían traballando na zona, tratando de dar por controlado o incendio e arrefriando os puntos que concentraban maior temperatura, de onde aínda seguía saíndo fume.
Ata o lugar desprazábase esta mañá tamén un equipo da policía científica da Garda Civil. Sobre o terreo intentaban recoller mostras coas que poder esclarecer a posible orixe do lume.
