BOIRO> O Club Deportivo Boiro e a peña ‘Krusadas Boirenses’ promoven unha campaña solidaria de recollida de produtos de hixiene e limpeza. A iniciativa conta coa colaboración de Cruz Vermella e o concello de Boiro.
O partido que disputará o Club Deportivo Boiro en Barraña fronte ó Ribadeo o 11 de decembro transcenderá o ámbito deportivo para tomar tamén un cariz social. O Club organizou xunto con ‘Krusadas Boirenses’ unha campaña de recollida de produtos de primeira necesidade de hixiene e limpeza.
Ademais de no propio campo, os cidadáns que queiran colaborar poderán tamén achegar os seus produtos ata a casa do concello ou ás dependencias da Cruz Vermella no centro social de Boiro.
Tódolos artigos recadados serán distribuídos por Cruz Vermella entre as familias do municipio con maior necesidade. dende a entidade destacan o gran resultado deste tipo de campañas que a peña ‘Krusadas Boirenses, leva promovendo dende hai anos.
