BOIRO> A Policía Local de Boiro conta tan só cun axente en activo debido ó alto número de baixas laborais. Aínda así, dende o concello mandaron unha mensaxe de tranquilidade ás familias posto que o servizo está cuberto pola Garda Civil.
A policía local de Boiro atópase en cadro. Á progresiva merma da plantilla que se foi dando nos últimos anos engádese agora o elevado número de axentes que se atopan de baixa co que actualmente o servizo está cuberto tan só por un policía e dous auxiliares. Traballan en quenda de mañá os días laborables polo que o resto do tempo é a Garda Civil que asume as súas responsabilidades.
Malia que o servizo está cuberto, a situación do corpo dista de estar normalizada. Varios axentes manifestaron a súa intención de solicitar unha comisión de servizo para traballar noutros municipios. A este respecto, o alcalde aclarou que non existe ningunha petición formal que debe ser realizada polos concellos que reclamen os servizos dos axentes.
