NOIA> O BNG de Noia levará a pleno a necesidade de renovación dos xulgados ante a falla de espazo e o mal estado das actuais dependencias xudiciais. Trasladarán tamén esta proposta ó Parlamento a través da deputada nacionalista, Rosana Pérez.
Tras reunirse coas federacións de Xustiza da CIG e de UXT, o BNG de Noia levará a pleno unha iniciativa solicitando a mellora das condicións dos xulgados, ben sexa a través da rehabilitación integral do actual edificio ou do traslado das dependencias xudiciais a outra sede.
Piden a realización dun informe por parte dos servizos técnicos que determine as necesidades e requisitos que deben reunir os xulgados para garantir o seu bo funcionamento. En paralelo a este proceso, solicitan o traslado temporal de parte da documentación almacenada no rexistro para evitar o seu deterioro derivado das filtracións de auga e liberar espazo mentres non se adopta unha solución definitiva.
Os nacionalistas trasladarán o asunto tamén ó Parlamento a través da súa deputada Rosana Pérez quen denuncia non só os problemas que presentan as instalacións senón tamén a falla de persoal nos xulgados de Noia que prestan servizo a unha poboación de máis de 27 mil habitantes.
Dende o BNG consideran insuficientes as obras que se están a executar no marco dun plan autonómico de infraestruturas xudiciais posto que suporán apenas un lavado de cara para as instalacións