MADRID> O xeodestino ría de Muros-Noia aprovéitase do tirón dos ‘influencers’ locais Rogelio Santos e María Maceiras para promocionarse este ano en Fitur. Dende a entidade incidiuse na posta en valor da sostinibilidade da pesca e o marisqueo, a través dun documental con testemuños dos propios veciños da zona para dar a coñecer os verdadeiros atractivos da comarca.
Cun formato diferente ó de edicións anteriores, o xeodestino ría de Muros-Noia, presentouse en Fitur destacando a vinculación desta comarca co mar, a través da pesca e o marisqueo, como un valor seguro e sostible por natureza.
Nun vídeo, no que os protagonistas son os propios habitantes da contorna, vanse contando diferentes experiencias que exemplifican a relación que estes manteñen, dende sempre co mar, un espazo privilexiado, e con moitos encantos aínda por descubrir.
Este ano, na presentación da feira, contaron ademais con dous rostros coñecidos da zona, como son os ‘influencers’ Rogelio Santos, de Porto do Son, e María Maceiras, de Muros. Os dous encargáronse de poñer en valor as excelencias do xeodestino, como un lugar apetecible para visitar, con enormes potencialidades.
