Homenaxe a Maite Méndez e á Orquestra Sinfónica nos Premios Cidade de Pontevedra 2022

PONTEVEDRA> Hoxe, 20 de xaneiro é o Día de San Sebastián, patrón da cidade de Pontevedra. Unha xornada que o concello celebra coa entrega dos Premios Cidade de Pontevedra, que cada edición recoñecen a importancia para a sociedade pontevedresa dunha persoa xurídica e doutra física. No 2022 o xurado decidiu premiar a traxectoria da Orquestra Sinfónica e da adestradora do Club Baloncesto Arxil Maite Méndez.

Como cada 20 de xaneiro, Pontevedra celebrou o seu tradicional pleno de honra para facer entrega dos Premios Cidade de Pontevedra. Uns recoñecementos cos que se busca recoñecer o papel dos que, como explicou o alcalde, deixan pegada no municipio.

Este ano, na categoría de persoa física o xurado votou por unanimidade a candidatura de María Teresa Méndez, Maite Méndez, adestradora do Club Baloncesto Arxil. Ademais de poñer en valor a traxectoria dun equipo que comezou a andaina hai 38 anos, reclamou máis apoios para o deporte feminino.

A Orquestra Sinfónica de Pontevedra foi a escollida na categoría de persoa xurídica, tamén co apoio de todos os membros do xurado. A entidade traballa dende o 2006 para fomentar a música tendo sempre en conta a perspectiva de xénero.

O acto central do Día de San Sebastián, patrón de Pontevedra, rematou co himno galego interpretado polo grupo Gaiteiros das Rías Baixas.