OUTES> Outes conta cun novo espazo museístico para a posta en valor da carpintería de ribeira. Este sábado abría as súas portas o estaleiro do Ciprián convertido nun centro de referencia en toda Galicia.
No marco incomparable que ofrece a enseada de Broña, emerxe o estaleiro do Ciprián como novo centro cultural e turístico de Outes. A construción, que data de principios do século XX, foi rehabilitada conservando a súa esencia orixinal para converterse nun museo sobre a carpintería de ribeira, actividade da que o municipio outense foi berce e na que segue moi presente.
Ademais de recuperar todo este patrimonio cultural, as administracións traballan da man para seguir mantendo viva a construción naval en madeira, como actividade económica puxante xeradora de emprego e riqueza.
A instalación componse de 5 salas con distintas exposicións que ofrecen ó visitante un percorrido pola historia da carpintería de ribeira dende as súas orixes.