POBRA> Foi a chamada dun particular á Policía Local, pasadas as dez e media desta mañá, alertando de que unha embarcación con tres tripulantes a bordo acababa de envorcar e afundir fronte á costa da Pobra.
Unha vez alí, os axentes, vendo o que estaba acontecendo, avisaron ó 112, dende onde se estableceu un operativo de rescate, coordinado polo Centro de Salvamento Marítimo de Fisterra, que mesmo chegou a mobilizar á Salvamar Sargadelos.
Por fortuna non houbo que lamentar danos persoais. Un barco bateeiro que estaba pola zona foi o primeiro en socorrer e rescatar ós mariñeiros que se atopaban subidos á quilla da embarcación.
Polo de agora descoñécense as posibles causas do naufraxio deste barco, co nome ‘Pavía’ con porto base en Cambados.