BOIRO> Arranca en Boiro a primeira Feira do emprego do Barbanza co obxectivo de facilitar a relación entre o tecido empresarial e os demandantes de emprego. Ademais dunha serie de foros profesionais, as empresas da comarca instalarán os seus expositores para dar a coñecer a súa oferta laboral.
Establecer vínculos entre os distintos axentes que interveñen no proceso da oferta e demanda laboral. Con este obxectivo nace en Boiro a primeira feira do emprego que arrancaba esta mañá con dous foros sobre os eixos do desenvolvemento económico a as estratexias en materia de formación.
A feira nace con vocación de continuidade coa fin de consolidarse como unha ferramenta necesaria para a creación de sinerxias entre as empresas e os potenciais traballadores.
A feira continuará mañá venres cunha xornada na que as empresas da comarca instalarán os seus expositores destinados a demandantes de emprego. Impartiranse ademais varias charlas sobre a busca activa de emprego, o emprendemento, a orientación laboral ou a inserción laboral das persoas con discapacidade ou en risco de exclusión.
