García Diéguez promete traballo e boa xestión para tratar recuperar a alcaldía de Boiro

BOIRO> O Partido Popular de Boiro celebrou onte pola noite no restaurante Chicolino o acto de presentación da súa candidatura para as próximas eleccións municipais.

Arroupado por numerosos militantes e simpatizantes desta formación na localidade, así como tamén da totalidade dos candidatos populares na comarca, Fernando García Diéguez, aludiu á idoneidade da súa lista e a necesidade de que o PP volva a recuperar a alcaldía, á deriva, segundo el, dende a chegada de Martiño ó goberno municipal.

No acto García Diéguez contou tamén coa presenza da conselleira de Política Social, Fabiola García, quen destacou a valía do candidato, segundo ela, con experiencia e bo xestor, traballando sen descanso na defensa dos intereses dos veciños.

Ademais comprometeu o apoio da Xunta para que Boiro conte coa tan demandada residencia.

No acto deuse a coñecer tamén ás persoas que integran a lista coa que os populares boirenses concorrerán ós vindeiros comicios municipais.

Unha lista moi renovada e heteroxénea, que incluirá a Nolo Romero, actual edil na corporación municipal, como número dous. De tres irá María Blanco.

Os postos catro e cinco serán para Alba Ferreiro e Juan Antonio Moledo, outro que repite. De seis Vanesa Somoza.

Pechando os dez primeiros postos con Alba Sayáns, David Reboiras, Ana Belén Moares e José Navarro.

DEIXAR UNHA RESPOSTA

Por favor, engade un comentario!
Por favor, engade o teu nome aquí