RIBEIRA> O PSOE de Ribeira presentou a pasada tarde a súa candidatura. Francisco Suárez-Puerta lidera unha lista caracterizada pola renovación e a mocidade dos seus integrantes.
Arroupado polo secretario xeral do PSdeG, Valentín González Formoso, así como o secretario provincial, Bernardo Fernández, a deputada Begoña Rodríguez e numerosos compañeiros de filas, o candidato socialista de Ribeira presentou o equipo co que pretende dar un cambio de rumbo á política no municipio. Francisco Suárez-Puerta encabeza unha lista plenamente renovada na que destaca a xuventude dos seus integrantes que concorren ás eleccións do 28 M con ganas de traballar para recuperar o dinamismo que Ribeira merece.
Entre os principais puntos do seu programa electoral destaca a aposta por crear máis chan industrial para poñer freo á fuga de empresas, as melloras no transporte público ou na sanidade coa reforma urxente do centro de saúde ou o deseño dunha ampla oferta deportiva e cultural, entre outras.
Xunto con Suárez-Puerta que inicia con esta candidatura a súa andaina na política activa, integran os primeiros postos da lista Ana Alvite, Alberto Suárez, Nuria Pérez e Francisco Regueira.
