A Policía Nacional denuncia o incremento de agresións contra axentes e reclaman máis protección

PONTEVEDRA> Axentes da Policía Nacional concentráronse esta mañá ás portas da comisaría provincial de Pontevedra. O corpo reclama máis protección e denuncia o incremento de agresións que están a sufrir nos últimos tempos mentres desempeñan o seu traballo. A concentración celebrouse unha semana despois de que un mozo entrara nas dependencias pontevedresas e ferira a un axente cunha arma branca.

Máis protección para os axentes da Policía Nacional no desempeño do seu traballo. Esta é a reclamación pola que hoxe se concentrou unha vintena de policías ás portas da comisaría provincial de Pontevedra.

Hai unha semana que a comisaría foi o escenario dunha destas agresións. Un mozo de 26 anos entraba cunha arma branca nas dependencias e feriu a un dos axentes.

Os sindicatos lamentan que non só se trata de falta de protección legal. A falta de medios tamén pon en perigo aos axentes mentres exercen o seu labor.

No caso de Pontevedra, os representantes sindicais recordaron dúas vellas demandas: melloras nas instalacións da Comisaria e a creación dunha Unidade de Prevención e Reacción para a cidade pontevedresa e a súa área metropolitana.