VILAGARCÍA> Luz verde da Mesa do Parlamento de Galicia á iniciativa lexislativa popular para o recoñecemento e protección das actividades pesqueiras e marisqueiras. A proposta comeza así a súa andaina ao contar co visto bo dos servizos xurídicos da cámara galega. Agora a comisión promotora, que representa a gran parte do sector do mar de Galicia, terá ata mediados do mes de decembro para recoller as sinaturas necesarias.
Comeza a andaina da iniciativa lexislativa popular que pretende o recoñecemento e protección das actividades pesqueiras e marisqueiras. Estes días a proposta foi admitida a trámite pola Mesa do Parlamento de Galicia.
O seus impulsores teñen agora ata finais do mes de agosto para presentar o modelo de prego de recollida de sinaturas. Despois, terán ata mediados do mes de decembro para recompilar os apoios necesarios.
A intención da comisión promotora é comezar a campaña no mes de setembro. Ademais buscarán a complicidade dos partidos políticos. Na súa axenda está reunirse cos partidos presentes no Parlamento para trasladarlles a impotancia desta iniciativa lexislativa popular. Tamén a levarán aos plenos das corporacións municipais.
Na comisión promotora están representados o sector do mar da ría de Arousa, a Federación Galega de Confrarías, a Federación provincial da Coruña e as plataformas das rías de Vigo, Pontevedra, Muros-Noia e Arousa. Tamén o Colectivo Ecoloxista do Salnés.
