PORTO SO DON> Porto do Son xa está inmerso nas súas festas coas que despedirá o verán. O actor Antonio Garrido inaugurou as celebracións na honra da Virxe do Carme cun pregón no que destacou as bondades da vila sonense e as súas xentes.
O desfile dos cabezudos das Viqueiras, tradición recuperada este ano, anunciaban o inicio das festas do Carme de Porto do Son. Á súa chegada á praza de España eran recibidos pola alcalde a e concelleira de Cultura así como polo actor Antonio Garrido. Este ilustre sonense de adopción exerceu de pregoeiro exaltando as moitas virtudes de Porto do Son e as súas xentes.
Trala inauguración oficial, os sonenses teñen por diante cinco días de festas. Ademais de música, actividades infantís e animación para tódolos públicos, destacan no programa citas ineludibles como a procesión do Carme que sairá mañá ás dez e media da mañá ou a romaría do Loreto que se desenvolverá o sábado.
As celebracións continuarán ata o luns con concertos e verbenas amenizadas polas mellores orquestras. O espectáculo de fogos de artificio e a festa da auga pecharán os festexos ata o próximo ano.
