RIANXO> O Club de Montaña Vintedouspés organiza, en colaboración co concello de Rianxo, a quinta edición da Andaina do Barbanza, incluída na Liga Xunta de Galicia de Senderismo. Será o vindeiro domingo 1 de outubro. Haberá dous percorridos, un oficial de 25 quilómetros, e outro de 15. A saída está prevista para as nove da mañá dende a zona portuaria.
O percorrido nas dúas probas coincidirá en boa parte do trazado, que discorrerá por diversos enclaves do Concello como é o caso do alto da Pena, o entorno do río Té ou a subida ó Castro Barbudo.
As inscricións estarán abertas ata o vindeiro 27 deste mes de setembro, a través da plataforma de emesports.
Aquelas persoas que o desexen tamén poderán anotarse no servizo de Deportes ou a través da web de Vintedouspés.
Prevese unha participación próxima ás trescentas persoas.
Dende a organización quixeron agradecer ó Concello a súa colaboración coa proba, así como tamén as distintas empresas e casas comerciais que coas súas aportacións fan posible o desenvolvemento desta andaina.
