RIBEIRA> O concello de Ribeira oferta catro obradoiros para este Nadal. Serán de balde e impartiranse nas parroquias. Ademais, como tódolos anos, volverá poñer en marcha o campamento de conciliación para os nenos.
Ribeira incrementa este ano a súa oferta de obradoiros de Nadal cun total de catro disciplinas. Serán arte floral, cerámica, decoración de caixas de madeira e de botes de Nadal.
A concelleira informou ademais da apertura do prazo para inscribirse no campamento de conciliación que se celebrará nas instalacións do CEIP O Grupo entre o 22 de decembro e o 5 de xaneiro. Os interesados poden solicitar praza a partir deste luns ben vía telemática ou de xeito presencial na casa da xuventude de nove a dúas.
A listaxe de admitidos farase pública o 12 de decembro e a partir de entón poderase realizar o pago para confirmar matrícula. O prezo será de 40 euros con bonificacións dun 20 por cento para determinados colectivos como familias numerosas, acolledoras ou desempregados de longa duración entre outros.
