POBRA> O salón de plenos do Concello vestiuse de gala este sábado para acoller o acto de recoñecemento institucional a Isaac Maceiras, alcalde da localidade durante dezaseis anos, entre 1999 e 2015.
Foi un acto emotivo e de xustiza. No que non faltou ninguén. Deses que tanto lle gustaban a el organizar cando era rexedor.
Ademais da actual corporación, tamén asistiron numerosos edís que formaron parte dos gobernos locais durante os seus mandatos; varios ex-alcaldes, como é o caso do de Boiro, Xosé Deira, e Ribeira, Manuel Ruiz, cos que aínda comparte gran amizade; representantes do tecido asociativo e empresarial local, así como tamén numerosos veciños, que non quixeron perderse tampouco este recoñecemento.
Na súa intervención o actual alcalde, José Carlos Vidal, destacou a calidade humana do homenaxeado e os logros acadados durante os seus mandatos.
Na súa intervención, Isaac Maceiras, agradeceu a homenaxe, confesando sentirse enormemente satisfeito por ser xa parte da historia da localidade.
O acto continuou posteriormente coa imposición da medalla do Concello e a súa sinatura no libro de honra. Tamén se lle fixo entrega de varios agasallos consistentes nunha dorna de cerámica e unha metopa de sobremesa con dedicatoria.
Pero para o final estaba reservado o acto principal. Como é tradición no Concello procedeuse ó descubrimento da fotografía do ex-rexedor no salón de plenos. Un momento especial para Maceiras, que quixo compartir tamén coa súa familia, especialmente os seus netos, que o acompañaron no momento do descubrimento do cadro.
