O BNG insta á Xunta a activar o nivel 2 do CAMGAL para frear o vertido de plásticos

RIBEIRA>O BNG insta á Xunta de Galicia a activar o nivel medio do Plan de Continxencias contra a Contaminación Mariña. Ana Pontón facía este chamamento nunha visita realizada esta mañá ó Parque Natural de Corrubedo para avaliar o impacto ambiental dos residuos que están chegando á costa.

Acompañada por responsables do goberno municipal e do GAEM de Ribeiram, que coordina os operativos de limpeza na zona, a voceira nacional do BNG visitaba esta mañá o Parque Natural de Corrubedo para coñecer o alcance do vertido de pellets de plástico nesta zona especialmente sensible. Dende alí, Ana Pontón volvía a instar á Xunta a activar o nivel 2 do CAMGAL para conseguir unha mellor coordinación de medios que permitan facer fronte ó vertido. Nesta mesma liña, dende o concello de Ribeira reclaman máis recursos fronte a esta catástrofe que, din, non é competencia municipal posto que afecta xa a toda a costa galega.

O BNG acusa ademais ó goberno da Xunta de ocultar información sinalando o paralelismo coa xestión do desastre do Prestige. A este respecto pídenlle á Consellería de Medio Ambiente que faga públicos os informes nos que presuntamente se confirma que os pellets non son tóxicos.

DEIXAR UNHA RESPOSTA

Por favor, engade un comentario!
Por favor, engade o teu nome aquí