RIBEIRA> Á espera de que a Xunta publique os informes sobre a toxicidade dos pellets, o concello de Ribeira decidiu encargar pola súa conta os análises do material para coñecer o alcance do dano ambiental que poidan provocar. Ata o momento, na costa ribeirense téñense retirados 75 sacos enteiros deste material.
O concello de Ribeira foi o primeiro en dar a voz de alarma o pasado 13 de decembro comunicando á Xunta a chegada das boliñas de plástico ó seu litoral. Dende entón, mobilizaron tódolos recursos dispoñibles con persoal da brigada municipal de emerxencias e do servizo de recollida de lixo traballando nos areais, dos que a día de hoxe xa se levan retirados 75 sacos de pellets.
O material retirado das praias está a ser almacenado na nave municipal do servizo de limpeza á espera de coñecer o resultado das análises encargadas polo concello para coñecer a composición e toxicidade do mesmo.
Os resultados daranse a coñecer ós sectores afectados a reunión do Consello Local de Pesca convocado para este venres. Paralelamente, dende o concello seguen a monitorizar a costa cun dron para detectar a posible chegada de máis sacos e esta fin de semana volverán coordinar dispositivos de recollida voluntaria en varios areais.
