NOIA> O Xulgado de Instrución Número 2 de Noia acordou incoar dilixencias pola posible existencia dun delito contra os recursos naturais e o medio ambiente polo vertido de pellets de plástico.
A xuíza ordenou ó SEPRONA remitir un informe sobre a titularidade do buque e as circunstancias nas que se produciu a perda da carga así como a natureza, posible toxicidade e a delimitación da área afectada.
No auto, a xuíza explica que non están determinadas as circunstancias nin as persoas que nelas interviñeron polo que é preciso practicar as dilixencias previas.
Estas actuacións derívanse da denuncia presentada inicialmente polo partido político Podemos á que se acumulou a interposta conxuntamente pola Fundación Montescola, Ecoloxistas en Acción e a Plataforma pola Defensa do Mar da comarca de Muros-Noia.
