PONTEVEDRA> Máis presenza policial e máis coordinación entre a Policía Nacional, a Policía Local e os servizos sociais. Son as medidas que se aplicarán nas contornas da praza da Ferrería e de Campolongo, en Pontevedra, para intentar poñer fin aos episodios de conflitividade que se están a dar nestas zonas. Así o decidiu a Xunta Local de Seguridade celebrada esta mañá. O alcalde e o subdelegado do Goberno recoñeceron a súa preocupación pola sensación de inseguridade que denuncian comerciantes e veciños pero apuntan que só se rexistraron 20 denuncias nestes espazos e todas por delitos leves.
Pontevedra celebrou hoxe a súa xunta local de seguridade. Un encontro técnico que tivo sobre a mesa unha cuestión principal: os episodios conflitivos que se están a dar en puntos do centro da cidade, como a praza da Ferrería, as Galerías Oliva e a rúa Augusto García Sánchez, en Campolongo.
Ante as queixas de veciños, hostaleiros e comerciantes destas zonas, na xuntanza decidiuse incrementar a presenza policial.
Son estas características as que fan que a situación sexa especialmente sensible.
A pesares da percepción social, dende a Subdelegación do Goberno apuntan que non se deu un incremento dos delitos na cidade. Tampouco na Ferrería e en Augusto García Sánchez.
Antes desta reunión da xunta local de seguridade, Fernández Lores e Losada recibiron a representantes de veciños, comerciantes e hostaleiros da Ferrería para recoller o seu malestar e atender as súas reivindicacións.
