A POBRA> Os actos organizados pola Comisión para a Recuperación da Memoria Histórica do Barbanza polo Día da República serviron para sacar á luz a historia do campo de concentración do Pozo, na Pobra. Tras instalar un panel informativo na zona da Lomba, procedeuse á presentación do caderno sobre os campos de concentración en varios concellos do Barbanza.
A Pobra acolleu boa parte dos actos conmemorativos do Día da República celebrados pola Comisión para a recuperación da memoria histórica do Barbanza. O primeiro deles foi a inauguración dun panel informativo no antigo campo de concentración do Pozo, na Lomba. O obxectivo é dar a coñecer entre a veciñanza a existencia deste lugar e dignificar a memoria daqueles que estiveron alí apresados e de tódalas persoas que loitaron por defender a liberdade.
Tras este acto, tivo lugar no auditorio do museo Valle-Inclán a presentación do caderno ‘Campos de Concentración. Muros, A Pobra e Rianxo’ e o nomeamento de Xesús Redondo Abuín como republicano de honra. Os actos concluíron o domingo cunha ofrenda cívica ante o monumento pola memoria histórica no Confurco.
