SANXENXO> A rapazada do colexio Magaláns de Dorrón, en Sanxenxo, aprendeu hoxe a preparar almorzos saudables. Eles foron o primeiro grupo en pasar por esta iniciativa do Obradoiro de Hostalería da Mancomunidade do Salnés, onde o propio alumnado ensina aos nenos e nenas hábitos tan bos para a saúde como saborosos. Ao longo das vindeiras semanas outros centros da zona participarán na actividade, sen ir máis lonxe, mañá mesmo será a quenda da rapazada do colexio da Armenteira de Meis.
Hoxe botaron a andar os almorzos saudables que impulsa o Obradoiro de Hostalería da Mancomunidade do Salnés. Nesta primeira xornada foi a rapazada do colexio de Magaláns, en Dorrón, o que participou na actividade.
Pero o menú, e isto é importante, está composto por ingredientes saudables. Porque nesta actividade nada é o que parece e, por exemplo, un biscoito como este pode ter o calabacín como ingrediente principal. Do que se trata é de que a rapazada vaia aprendendo bos hábitos á hora de alimentarse.
A rapazada tivo oportunidade de cociñar unha pizza de vexetais, facer pan, e preparar un almorzo nun bufé a base de froita e lácteos. A actividade rematou aprendendo a poñe-la mesa como nun auténtico restaurante. Un xeito tamén de ir familiarizando a todos estes pequenos cun sector laboral con moita demanda na comarca.
Por aquí pasarán nas vindeiras semanas outros grupos de nenos e nenas doutros centros. Unha actividade coa que colabora tamén o concello de Sanxenxo, destacando a importancia de que a rapazada tome conciencia destes hábitos saudables.
Ademais a actividade ábrese a outros centros da comarca. Sen ir máis lonxe este xoves pasará por aquí o cole da Armenteira do concello de Meis.