BOIRO> A Audiencia Provincial da Coruña vén de condenar a dous boirenses a dous anos e tres meses de prisión por vender xel hidroalcohólico elaborado con licor nun galiñeiro durante os primeiros meses do estado de alarma da Covid.
Na sentenza o Tribunal considerou que os feitos xulgados constitúen un delito de estafa continuada e outro contra a saúde pública.
Os dous acusados aproveitaron a gran demanda existente durante os primeiros meses da pandemia para fabricar e distribuír de xeito ilegal o xel hidroalcohólico.
No laboratorio clandestino que tiñan incautáronse uns 400 litros dos máis de seis mil elaborados, segundo transcendeu na investigación. A Fiscalía pedía inicialmente 8 anos e 2 meses de prisión para cada un dos acusados, pero reduciu a pena a 27 meses tendo en conta a atenuante da reparación do dano.
Os dous aceptaron o pago da multa de máis de 17 mil euros para evitar o cárcere, e comprometéronse a non cometer delito algún durante un período de dous anos.
