PONTEVEDRA> O alcalde de Pontevedra, convencido de que este pode ser un dos seus mellores mandatos. A piques de cumprirse un ano da toma de posesión, Miguel Anxo Fernández Lores está satisfeito co balance destes 365 días. Un tempo, dixo, no que se realizaron cambios importantes na estrutura do goberno para desatrancar a administración e priorizar proxectos como o parque da Parda ou a reforma da Santiña.
Miguel Anxo Fernández Lores recordou estas palabras que marcaron o inicio do seu sétimo mandato como alcalde de Pontevedra ao inicio rolda de prensa para facer balance destes primeiros 12 meses.
Segundo Fernández Lores, neste ano aprendeu dos erros e tomou decisións para intentar corrixilos.
Pon como exemplo deste novo ritmo algúns dos proxectos impulsados nos últimos tempos, como a reforma da Santiña, o parque da Parda, o pavillón de tenis de mesa de Monte Porreiro ou o vial de Mollavao.
O rexedor tamén reflexionou sobre o papel xogado polos partidos da oposición, principalmente ao impedir a aprobación dos orzamentos.
O éxito da programación das festas na cidade, a intensa actividade congresual, feiral e de eventos deportivos e a recentemente anunciada escolla de Pontevedra como sede dos Premios Feroz para os vindeiros anos, foron algunhas das cuestións que Fernández Lores citou como exemplo deste novo tempo para o seu goberno.
