RIBEIRA> Os percebeiros de Aguiño iniciaron este mes de xullo a campaña con moi bos resultados. Nestas primeiras xornadas houbo gran cantidade de recurso, máis do agardado, e o prezo medio roldou os 60 euros, superando tódalas expectativas.
Había ganas de percebe e notouse na demanda. Neste inicio da campaña en Aguiño, os compradores poxaron alto superando o prezo medio os 60 euros.
Os mariscadores están a traballar na zona comprendida entre Punta Couso e Río Sieira onde adoitan iniciar a campaña de verán reservado a zona norte para máis adiante. Alí constataron a presenza de recurso de calidade, aínda que non de gran tamaño.
Tras este gran arranque agardan que os prezos se manteñan posto que nos meses de xullo e agosto a demanda soe aumentar, especialmente por parte do sector da hostalería e restauración.
