RIBEIRA> María Sampedro é a nova presidenta do PP de Ribeira. Foi elixida co apoio unánime de tódolos asistentes ó Congreso Local celebrado a pasada tarde. Estivo arroupada polos principais responsables do partido así como numerosos afiliados e simpatizantes.
A nova presidenta local do PP de Ribeira asume con ilusión e ganas esta nova responsabilidade. A candidatura de María Sampedro foi refrendada polo cen por cento dos participantes no Congreso Local celebrado a pasada tarde na lonxa de Ribeira. Ademais de afiliados, simpatizantes e numerosos amigos e veciños que quixeron acompañar a Mariola neste día tan destacado, estivo arroupada por diversos responsables do partido. Entre eles, o presidente provincial Diego Calvo e a secretaria xeral do PPdeG, Paula Prado.
E é que un dos principais obxectivos de María Sampedro nesta nova etapa é recuperar a alcaldía de Ribeira para volver á senda da estabilidade.
Sampedro recolle o testemuño de Manuel Ruíz cunha clara vocación de continuidade. Aínda que non puido asistir ó Congreso polos seus compromisos laborais, o senador quixo estar presenta a través dun vídeo no que lle augurou grandes éxitos á súa sucesora.
