RIBEIRA> A Deputación da Coruña celebrou onte pola noite no novo auditorio de Ribeira a sexta edición dos premios PEL. Uns galardóns cos que a institución provincial recoñece cada ano ás mellores empresas, asociacións e clústeres empresariais da provincia.
O auditorio municipal de Ribeira vestiuse de gala para acoller a entrega dos premios PEL da Deputación da Coruña.
Ó acto asistiu unha ampla representación da vida política e empresarial, non só da comarca do Barbanza, senón de toda a provincia.
Ademais do presidente da Deputación, Valentín González Formoso, e varios deputados provinciais, contou coa presenza tamén de varios alcaldes, entre eles o anfitrión, o de Ribeira, encargado de dar a benvida ó acto.
Este ano ós Premios PEL presentáronse un total de 92 candidaturas. Récord de participación de tódalas edicións celebradas ata o de agora.
Un feito que destacou tamén o presidente provincial na súa intervención, xa que segundo el, mostra o enorme potencial que ten a provincia coma motor económico de Galicia.
Na gala entregáronse un total de catro premios correspondentes a outras tantas categorías, cunha dotación económica duns 18 mil euros cada unha.
Na categoría de Mellor iniciativa empresarial nova distinguiuse a Tempo Social Training Club que aposta pola integración e dinamización da poboación rural a través da creación de comunidade e o fomento de hábitos de vida saudables.
Na categoría de Mellor iniciativa empresarial consolidada premiouse á axencia de viaxes especializada no camiño de Santiago Pilgrim Travel SL
Na de Mellor iniciativa verde o galardón foi para Insertega, pola súa labor a prol do medio ambiente e a integración social e na categoría de Mellor iniciativa transformadora do rural o premio recaeu na firma Bico de Xeado.
No acto tamén se recoñeceu xornalista Julio Pérez Domínguez coma mellor comunicador en materia de Economía e Empresa.
