BOIRO> Os alcaldes de Boiro, Rianxo e A Pobra visitaron esta mañá o Centro de Formación de Espiñeira onde se está a desenvolver o Programa Integrado de Emprego. Hai anos que as tres administracións colaboran nesta iniciativa conxunta que vén acadando índices de inserción laboral moi elevados.
Un cento de alumnos participan no Programa Integrado de Emprego que promoven os concellos de Boiro, A Pobra e Rianxo grazas a unha subvención autonómica. Os tres alcaldes desprazáronse ata o centro de formación de Espiñeira onde se están a impartir as sesións formativas para coñecer o avance do programa iniciado no mes de outubro.
Hai xa anos que os tres concellos decidiron emprender esta andaina conxunta para favorecer a empregabilidade da veciñanza con itinerarios personalizados enfocados ás necesidades de contratación dos sectores produtivos da zona. Os resultados, ata o de agora, son moi positivos.
Ademais do PIE, os tres concellos tamén colaboran no Programa de Garantía Xuvenil no que 15 mozos da comarca reciben formación en materia de montaxe de equipos informáticos e operacións auxiliares con tecnoloxías de información e comunicación.
