A ILLA> Visitar a Illa de Arousa sempre é un bo plan. Esta mañá un grupo de invidentes participou nunha experiencia que lle permitiu descubrir a Conserveira de Goday, a través dos sentidos. Mediante o tacto ou o oído conseguiron mergullarse no patrimonio e na historia do municipio insular. O encargado de guiar este percorrido a través dos sentidos foi o alumando de turismo do Carlos Oroza de Pontevedra.
Este cartel perdeu todo o seu sentido nesta xornada na que tocar, ulir ou escoitar son parte fundamental da experiencia. Un grupo de membros da ONCE achegáronse hoxe ata A Illa de Arousa para coñecer o patrimonio e historia da Conserveira Goday. Foron guiados, a través dos sentidos, por alumnado de turismo do Carlos Oroza de Pontevedra.
Unha experiencia que permitiu a este grupo coñecer dun xeito diferente A Illa e a súa historia mariñeira.
Para que esta experiencia fose completa para este grupo da ONCE, o alumnado leva tempo traballando nesta proposta. No Carlos Oroza levan anos organizando este tipo de actividades, pero é a primeira vez que a fan na Arousa. Unha práctica de fin de curso, ás portas xa de converterse en guías oficiais de Galicia.
O grupo tamén foi recibido en Goday por membros do goberno local, que celebran esta proposta que lles permite divulgar entre todos os públicos o patrimonio e historia insular.
A actividade rematou botando man do sentido do gusto, cunha degustación de produtos do mar elaborados polo alumnado do ciclo de restauración do Carlos Oroza.
