RIBEIRA> A cadea Vegalsa-Eroski entregou esta mañá un cheque á asociación Amicos por valor duns 5 mil euros. Os fondos, recadados a través de programas de reciclaxe, serán destinados a reforzar os proxectos medioambientais da entidade así como a impulsar a mellora das oportunidades de emprego das persoas con discapacidade intelectual.
A entrega do cheque tivo lugar esta mañá no supermercado Eroski Center de Ribeira, coa participación do director xeral de Amicos, Xoán España, e varios representantes de Vegalsa-Eroski. A doazón foi posible grazas á valorización realizada tras a xestión de preto de 40 mil quilos de tapóns de plástico e aceite recollidos nos establecementos da rede comercial de Eroski e Autoservizos Familia en Galicia, Asturias e Castela e León, e que foron reciclados polos clientes durante o ano pasado.
A empresa leva anos colaborando con Amicos en proxectos relacionados coa reciclaxe e outro tipo de accións medioambientais, como é o caso do programa RE-MAR liderado pola asociación, que tiña como obxectivo a custodia ambiental para a redución dos residuos no espazo mariño protexido do arco atlántico galego.
