RIBEIRA> A delegada territorial da Xunta na provincia desprazouse esta mañá ata o parque de San Roque para coñecer os traballos que están a desenvolver os alumnos do Tahume X. Trátase dun obradoiro de emprego conxunto entre os concellos de Ribeira e Porto do Son no que participan 20 alumnos.
Belén do Campo tivo ocasión de coñecer parte das tarefas que están a desenvolver os vinte alumnos do obradoiro Tahume X que promoven conxuntamente os concellos de Porto do Son e Ribeira. A visita desta mañá tiña lugar neste último municipio, no parque de San Roque, onde se están a executar tarefas de limpeza de maleza e restauración de mobiliario, enmarcadas nos dous módulos tanto de forestal como de carpintería.
Ademais desta importante contribución á comunidade, os alumnos reciben ó longo de nove meses que dura o obradoiro formación teórico práctica que permitirá a obtención dun certificado de profesionalidade.
Para levar adiante este compromiso coa formación e o emprego, a Xunta investiu este ano na comarca 1’2 millóns de euros sumando a este obradoiro os de Boiro e Noia e Lousame.
