RIBEIRA> A Confraría de Aguiño sementou un millón e medio de unidades de ameixa babosa nas súas autorizacións, aportados pola Xunta de Galicia. Na sementeira participaron o propio Conselleiro do Mar xunto coa directora xeral de Desenvolvemento Pesqueiro e a delegada territorial da Xunta na Coruña.
A Consellería do Mar e as confrarías seguen a dar pasos para incrementar a produtividade dos bancos marisqueiros. Desta volta, o pósito de Aguiño sementou millón e medio de unidades de ameixa babosa nunha superficie de aproximadamente 30 mil metros cadrados nos bancos do Castro e O Carreiro.
O propio Conselleiro do Mar, acompañado pola Directora Xeral de Desenvolvemento Pesqueiro, Marta Villaverde a delegada Territorial Belén do Campo desprazouse ata aAguiño para participar na solta de semente.
Ademais da posta a disposición da semente, cun investimento próximo ós 30 mil euros, a Consellería destinou nos dous últimos anos preto dun millón de euros a actuacións de mellora das condicións do sector en Ribeira como a mellora da cuberta da sede da confraría de Aguiño ou o reforzo da accesibilidade no porto de Palmeira, entre outras.
