A POBRA> Os alumnos do Salustiano Rey Eiras sa Pobra iniciaranse no baile da man do Taller Alecrín. Participarán en tres sesións de baile deportivo como parte do programa de Educación Física. Ademais das modalidades estándar e latina pecharán a actividade cun concurso de baile.
Os numerosos beneficios que implica o baile deportivo convérteno nun complemento ideal á programación de Educación Física. Así o entendeu o CEP Salustiano Rey Eiras da Pobra que este ano incorpora varias sesións para os nenos de sexto de primaria da man do Taller Alecrín.
Ó longo desta semana impartiranse tres sesións para os alumnos de sexto de primaria. Aprenderán os pasos e composicións coreográficas de dúas modalidades standard e dúas latinas para concluír cun simulacro de concurso de baile.
Os rapaces terán así oportunidade de achegarse ó mundo do baile deportivo, aínda moi descoñecido entre a sociedade. A modalidade estándar inclúe os bailes clásicos como vals, tango ou fox-trot mentres que en latinos a Federación tan só recoñece samba, pasodoble, rumba, chachachá e jive como baile deportivo.
