PONTEVEDRA> O Partido Popular posiciónase xa en Pontevedra de cara ás vindeiras eleccións municipais. O seu actual líder, Rafa Domínguez, asegurou que se atopa nun bo momento persoal e político, coa intención de repetir como candidato do PP. Nun almorzo informativo coa prensa, presentou as principais liñas que marcarán o seu plan para a cidade.
Rafa Domínguez ten intención de repetir como candidato do PP en Pontevedra. Está convencido de que conta co apoio da súa formación e traballa, dixo para ser o vindeiro alcalde da cidade.
Tanto é así que hoxe presentou as liñas mestras do seu proxecto para a cidade. Son trece puntos, entre os que destacan cuestións como realizar un estudo global do tráfico, a reapertura de Raíña Vitoria, aprobar un novo PXOM, ampliar o polígono do Campiño, destinar máis fondos aos servizos sociais, reforzar a Policía Local ou mellorar o mantemento de barrios e parroquias.
Para conseguilo, Domínguez confía no equipo que o está a acompañar neste novo mandato na oposición. Asegurou, ademais, que está no seu mellor momento para afrontar este reto.
Solucionar o problema de inundacións en Fernando Olmedo, aprobar rebaixas fiscais para atraer talento e empresas, construír máis equipamentos deportivos, apoiar a dragaxe do Lérez e reformar a zona de Beiramar para abrir a cidade á ría, son outras das liña que marcan o plan de Domínguez para Pontevedra.
