O SALNÉS> A Mancomunidade do Salnés, exemplo para os concellos das comarcas de Deza e Tabeirós. Esta mañá representantes do organismo comarcal recibiron a visita de alcaldes de varios municipios desas comarcas, interesándose polo modelo de xestión mancomunado que se presta no Salnés. Un encontro que parte da idea da actual Mancomunidade do Deza de incorporar novos municipios desa comarca e tamén da veciña de Tabeirós-Terra de Montes. O presidente dese organismo e alcalde de Lalín felicitou á Mancomunidade do Salnés polo seu traballo, asegurando que é a que mellor funciona de Galicia.
Deza e Tabeirós queren tomar como exemplo a fórmula exitosa da Mancomunidade do Salnés. O presidente comarcal recibiu hoxe a varios alcaldes desas comarcas para explicarlle como funciona aquí esta unión voluntaria dos nove concellos que, entre outras cousas, permite unir esforzos en distintos servizos e programas.
Entre os puntos fortes da Mancomunidade do Salnés, explica o presidente, áreas como as de emprego ou servizos sociais. Tamén salienta todo o relacionado coa auga e o mantemento de vías que, a través dun amplo parque de maquinaria común, permite chegar a todos os recunchos maximizando os recursos.
Cuestións que espertaron o interese dos concellos das comarcas de Deza e Tabeirós. Uns municipios que petan na porta do Salnés porque teñen enriba da mesa un plan de expansión. Nestes momentos a Mancomunidade de Terras de Deza está integrada por Lalin, Silleda, Rodeiro e Vila de Cruces. Ten en marcha un proceso de expansión, que suporía reintegrar a Dozón e Agolada e sumar á Estrada e Forcarei, de Tabeirós-Terra de Montes. Queren aproveitar este proceso para replicar alí o modelo que temos aquí.
A Mancomunidade do Salnés tamén acompañou esta mañá aos alcaldes de Deza e Tabeirós a unha xutnanza co Conselleiro de Presidencia en Santiago. Un encontro que, agardan, sirva para acelerar a incorporación dos novos concellos ao seu organismo, para o que marcan como punto de arranque o 2026.
