BOIRO> As familias de Boiro son as protagonistas da nova campaña promovida pola ABE. O obxectivo é promover as vendas no comercio de proximidade concienciando sobre as vantaxes sociais e económicas de mercar nas tendas locais.
Oito fotografías, nas que os protagonistas son 4 familias de Boiro, compoñen a última campaña da ABE. A través das pancartas e monolitos que xa locen nas principais rúas da vila, a asociación busca concienciar sobre a importancia do consumo local.
Como complemento á campaña, a ABE desenvolverá un concurso participativo para tódolos clientes. Tan só teñen que escanear o código QR que aparece nos carteis e votar pola súa fotografía favorita para entrar no sorteo de varios agasallos. Dispoñen de prazo para facelo ata o 22 de xuño.
Aínda que o sorteo realizarase o 23 de xuño, a campaña seguirá presente nas rúas de Boiro ó longo de todo o verán para seguir reivindicando o papel do comercio local como parte da identidade do pobo.
