VILANOVA> O Polo de Emprendemento de Vilanova de Arousa segue recibindo novos proxectos. O servizo consolidouse xa como unha ferramenta clave para o desenvolvmento emprendedor da comarca. En pouco máis de seis meses dende a súa apertura, xa atenderon 167 proxectos.
O Polo de Emprendemento de Vilanova, dependente da Xunta, leva operativo pouco máis de 6 meses. Dende aquela, este servizo non deixou de medrar, consolidándose como un motor clave para o desenvolvemento da comarca.
O perfil dos emprendedores é do máis variado. Iso si, das persoas que veñen a este servizo, o 58% son mulleres e o 42, homes.
Tamén é diverso o perfil dos proxectos, cunha especial presenza no sector de Actividades Administrativas e Servizos Auxiliares. As novas tecnoloxías e actividades vinculadas a sectores propios da zona, como o mar ou o turismo, tamén teñen un peso destacado.
Un dos casos que coñecemos hoxe é o dunha ilustradora. Coa idea enriba da mesa, atopou no polo toda a información que precisaba.
Aínda que recibiu un asesoramento integral, neste caso, recibiu as claves para impulsar o seu proxecto a través das redes sociais.
Pero a filosofía do polo é servir de acompañamento á persoa emprendedora ao longo de todo o proxecto. Así está sendo no caso doutra muller que quere iniciarse no mundo da mediación.
E explica que nese camiño foron quen de resolver todas as súas dúbidas.
Porque esa é a clave dos polos de emprendemento: acompañar un proxecto dende que nace ata que se consolide ou axudar a expandir aquel que xa está en marcha.
