PORTO DO SON> O concello de Porto do Son estrea unha unidade de estimulación cognitiva para persoas con demencia. O servizo, impartido por AGADEA, busca retrasar o deterioro dos doentes así como ofrecer asesoramento e apoio ás familias.
A detección precoz da demencia e a estimulación para retrasar o deterioro cognitivo son os obxectivos do novo servizo terapéutico que vén de poñer en marcha o concello de Porto do Son da man de AGADEA.
Ademais das terapias dirixidas ós doentes, contará cun servizo de apoio e asesoramento ás familias poñendo o foco tamén no benestar do coidador.
O servizo oferta inicialmente 12 prazas e se impartirá os luns, mércores e venres en horario de mañá no viveiro de empresas de Noal. Os interesados en participar poden solicitar máis información no departamento de Servizos Sociais do concello. É de balde para os usuarios e está financiado con cargo ó POS Social da Deputación da Coruña.
