RIBEIRA> Os detidos pola pelexa multitudinaria de Ribeira pasaron esta mañá a disposición xudicial en Ribeira entre fortes medidas de seguridade. A pesar do amplo dispositivo policial despregado da zona, a xornada transcorreu con normalidade e sen apenas presenza de familiares dos dous clans enfrontados.
Preto das nove da mañá chegaban ó xulgado de Ribeira os seis detidos trala multitudinaria pelexa entre clans xitanos que tiña lugar o pasado martes no centro recreativo de Artes. Catro homes e dúas mulleres, todos eles de Santiago, accedían á sede xudicial en dous vehículos entre fortes medidas de seguridade.
A Policía Nacional despregou un amplo dispositivo ante o temor de que puidesen producirse disturbios entre membros dos clans rivais. Sen embargo, a gran presenza policial e de medios de comunicación contrastaba coa ausencia total de familiares dos detidos e das vítimas. Tan só a última hora da mañá fixeron acto de presenza membros do clan de Santiago que se identificaron como mediadores para frear a escalada de violencia desatada trala liorta.
A pesar do talante con que acudían, segundo eles para evitar novos conflitos, á súa chegada á rotonda de Xarás foron interceptados por varias patrullas policiais.
Os familiares dos investigados defenden a súa inocencia e insisten en que o autor do atropelo mortal non é o irmá da vítima tal e como, din, se pode apreciar nos vídeos.
Á espera da celebración do xuízo, manterase o reforzo policial en Ribeira para evitar que os implicados decidan toma-la xustiza pola súa man.
