POBRA> A concelleira de Cultura, Patricia Lojo, acompañada dos membros da comisión de festas, foi a encargada de presentar a programación das festas do Carme do Castelo, que se celebrarán do 18 ó 20 deste mes de xullo.
A tradicional sardiñada e foliada do venres, dará paso ós concertos de grupos locais na praza do Emigrante.
Un dos pratos fortes do programa será o sábado 19, co Festival Folk na praza Alcalde Segundo Durán que chega este ano a súa novena edición e que terá á cantante Sés como cabeza de cartel.
Xa o último día, o domingo 20 terá lugar un dos actos máis solemnes e destacados como é a tradicional procesión que se celebrará trala misa na honra da Virxe do Carme na igrexa de Santiago do Deán prevista para as sete da tarde.
