VILANOVA> A Xunta pon de relevo o emprendemento feminino no marco do labor do polo de Vilanova de Arousa. As instalacións do Pazo de Vista Real recibiron hoxe a visita da directora xeral de Traballo Autónomo e Economía Social. Marta Mariño destacou que o polo vilanovés leva atendido máis de 200 proxectos. Deles, o 58% están impulsados por mulleres.
Dos máis de 200 proxectos que leva atendidos o polo de emprendemento de Vilanova de Arousa, o 58% están impulsados por mulleres. É o dato que hoxe presentou a directora xeral de Traballo Autónomo e Economía Social. Marta Mariño puxo de relevo o labor do emprendemento feminino á hora de garantir o futuro e a competitividade do tecido empresarial.
Mariño visitou esta mañá as instalacións do polo vilanovés, no Pazo de Vista Real. Aquí mantivo un encontro con dúas mulleres emprendedora que están a ser asesoradas por esta iniciativa.
Unha delas é Sila Santiso, promotora da empresa DTF Galicia, dedicada ao deseño e estampaxe téxtil, serigrafía, detalles para eventos, trofeos ou corte láser de pulseiras, entre outras.
Pola súa banda, María Búa, que emprendeu coa empresa de viaxes Marousa Tours, coa que promove un modelo de turismo sustentable, anima ás persoas que queiran sacar adiante os seus proxectos a recorrer ao polo vilanovés.
Na súa visita a Vilanova, Marta Mariño destacou outras iniciativas da Consellería como a Bolsa de remuda de negocios, que busca conectar a persoas interesadas en vender ou alugar a súa empresa con outras dispostas a continuar coa súa actividade, ou o Bono Remuda, orientado a facilitar a transmisión de negocios rendibles.
O polo de Vilanova é un dos tres da provincia de Pontevedra xunto cos de Silleda e O Porriño. Entre os tres, atenderon xa arredor de 1350 proxectos.
