PONTEVEDRA> Chamamento da Fundación Provincial Banco de Alimentos á cidadanía. Os días 7 e 8 de novembro a entidade celebrará a súa Gran Recollida. Pero para facela posible, precisa mobilizar máis de 800 voluntarios en Pontevedra e nas localidades do norte da provincia. O obxectivo: superar os 325.000 quilos de alimentos recadados no 2024.
800 voluntarios serán necesarios para poñer en marcha a Gran Recollida da Fundación Provincial Banco de Alimentos en Pontevedra e nas localidades do norte da provincia. Celebrarase os días 7 e 8 de novembro e a entidade fai un chamamento á cidadanía.
A nivel provincial serán máis de 2.500 voluntarios os que se repartirán entre 150 supermercados. A recollida realizarase baixo o lema ‘Dámolo todo’, cun formato de doazóns mixto: entrega de alimentos físicos e achegas económicas en caixa.
Nesta Gran Recollida, o Banco de Alimentos volverá contar coa complicidade de medio cento de centros educativos, da Brilat, a Garda Civil e a Escola Naval. Todos traballando cun obxectivo claro: superar os 325.000 quilos de alimentos que se recolleron no 2024, para manter o labor da Fundación ata primavera de 2026.
Na actualidade, a delegación pontevedresa do Banco de Alimentos axuda a máis de 5.000 persoas en Pontevedra e zona norte a través dunhas 40 entidades benéficas e ONGs coas que traballa. No 2024 entregáronse 1,4 millóns de quilos de comida en toda a provincia e, no primeiro semestre deste ano, repartiron xa 700.000 quilos.
Como cada ano, esta Gran Recollida estará apadriñada por un rostros coñecido. Polo de momento, o Banco de Alimentos mantén o segredo. Desvelarase o vindeiro 22 de outubro.
