RIBEIRA> A versión estendida do Culturgal chegará a Ribeira os días 25 e 26 de outubro. O auditorio municipal acollerá dúas xornadas cheas de actividade como antesala á gran feira da cultura que se celebrará en novembro en Pontevedra. Contará con destacados creadores como Kivo Cadaval, Fran Sieira ou Susana Sampedro, entre outros.
Dende hai dous anos, a asociación Culturgal aposta por descentralizar a feira que se celebra tódolos anos en Pontevedra. En 2023 e 2024,a versión estendida tivo lugar en Vigo e en Arzúa mentres que nesta decimo oitava edición recalará en Ribeira.
Será os días 25 e 26 de outubro no auditorio municipal que albergará unha escolma de actividades culturais para tódolos públicos con referentes culturais da comarca e de toda Galicia.
Estas dúas xornadas servirán como antesala á 18 edición de Culturgal que se celebrará do 28 ó 30 de novembro no Pazo da Cultura de Pontevedra.
